ከቄሮ የተላለፈ ማስታወቂያ

Standard

በምእራብ ኦሮሚያ እየተፈፀመ ባለው ግድያ እና በዛሬው ዕለትም ለሠራዊቱ ሕዝባችንን እንዲገድል በተሰጠው ግልፅ ትእዛዝ ሃገሪቱ ወደ አደገኛ ሁኔታ እያሽቆልቆልች ነው። የፓርላማ አባላት በ አስቸኩዋይ ጊዜ አዋጁ ላይ አቋም እስኪወስዱና አስኪያግዱት ወይም እስኪያፀድቁት ቄሮ የራሱን ዝግጅት በማድረግ ላይ ይገኛል። የፓርላማ አባላት የፊታችን አርብ በሚደረገው የፓርላማ ስብሰባ የ አስቸኩዋይ ጊዜ አዋጁን እንዲያፀድቁ በስልጣን ላይ ያለው ቡድን እያስፈራራቸው እንደሆነ እየሰማን ነው። ፓርላማው ይህን ሕገ ወጥ የ አስቸኩዋይ ጊዜ አዋጅ የሚያፀድቀው ከሆነ በቁርጠኛ ሕዝባዊ ተቃውሞ እንዲቀለበስ ይደረጋል። በመሆኑም ወደ ኢትዮጵያ የሚደረግም ሆነ በኢትዮጵያ ውስጥ ሊደርግ የታሰበ ጉዞ በሙሉ ከፊታችን አርብ ጀምሮ ሁኔታዎች እስኪረጋጉ ድረስ ላልተወሰነ ጊዜ እንዲራዘም አበክረን እናሳስባለን።

Advertisements

‘የአስቸኳይ ጊዜ አዋጁ አሻሚ ቋንቋና ሰፊ ክልከላዎችን የያዘ ነው” ሂዩማን ራይትስ ዋች

Standard

በቅርቡ የታወጀው የአስቸኳይ ጊዜ አዋጅ ለሰላማዊ የፖለቲካ እንቅስቃሴ በኢትዮጵያ ውስጥ ያለውን ቦታ የበለጠ ሊያጠበው እንደሚችል ሂዩማን ራይትስ ዋች ባወጣው ሪፖርት አስታወቀ።

ሪፖርቱ ጨምሮ እንዳለው መንግሥት በዓለም አቀፍ ሕጎች ጥበቃ የሚደረግላቸውን በነፃነት የመሰብሰብ፣ የመደራጀትና ሃሳብን የመግለፅ መብቶችን የሚከለክለውን ይህንን አዋጅ በአስቸኳይ እንዲያነሳ ወይም እንዲያሻሽል ጠይቋል።

ሪፖርቱ ቀደም ባለው የአስቸኳይ ጊዜ አዋጅ ወቅት የፀጥታ ኃይሎች ከ20ሺህ በላይ ሰዎችን ማሰራቸውንና መጠነ ሰፊ የሰብአዊ መብት ጥሰት መፈፀሙን አስታውሷል።

የአስቸኳይ ጊዜ አዋጁ ድንጋጌውን የሚተቹ የሚባሉ መረጃዎችን ማሰራጨት የሚከለክል ከመሆኑ በተጨማሪ የአዋጁን አፈፃፀም የሚከታተለው ኮማንድ ፖስት መገናኛ ብዙሃንን ለመዝጋት የሚያስችል ስልጣን ተሸጥቶታል።

ይህም በኢትዮጵያ ያሉት መገናኛ ብዙሃንና እየሰፋ የመጣውን የማህበራዊ ሚዲያ ተጠቃሚዎች ላይ አሳሳቢ ስጋት የሚደቅን ነው ብሏል ሪፖረቱ።

ከጠቅላይ ሚኒስትር ኃይለማሪያም ደሳለኝ የሥልጣን መልቀቅ ጥያቄ በኋላ በመከላከያ ሚኒስትሩ ይፋ የተደረገው የአስቸኳይ ጊዜ አዋጅ አሻሚ ቋንቋና ሰፊ ክልከላዎችን የያዘ መሆኑን የገለፀው የሂዩማን ራይትስ ዋች ሪፖርት፤ ይህ ሁኔታ መንግሥት ለሚወስዳቸው ያልተገቡ እርምጃዎች አመቺ ሁኔታን ይፈጥራል ብሏል።

አብዛኛዎቹ የመመሪያው ቋንቋዎች ግልፅ አይደሉም። በርካታ ቃላት ትርጉማቸው አልተቀመጠም።ለምሳሌ ‘ከፀረ ሰላም ቡድኖች ጋር መገናኘት’ ወይም ‘መቻቻልንና አንድነትን የሚያውክ’ ተግባርን ከመፈፀም መቆጠብ ይገኝበታል።

መንግሥት ሰላማዊ ጥያቄዎችን በሃይል በሚመልስበት የኢትዮጵያ ነባራዊ የፖለቲካ ሁኔታ፤ እነዚህ ግልፅ ያልሆኑ አንቀፆች የፀጥታ ኃይሎች የአስቸኳይ ጊዜ አዋጁን መጣስ ማለት ምን ማለት ነው የሚለውን እንዳሻቸው እንዲወስኑ ገደብ የለሽ ስልጣን ይሰጣቸዋል ብሏል ሪፖርቱ።

ሌላው ችግር ያለበት የፀጥታ ሃይሎች አመፅን ለማስቆም ያልምንም ፍቃድ ትምህርትቤቶችና ዩኒቨርሲቲዎች እንዲገቡና እንዲያስሩ የሚፈቅደው አንቀፅ ነው።

ይህ አንቀፅ መኖሪያ ቤቶችን ያለምንም ፍቃድ እንዲፈትሹም ለፀጥታ ሃይሎች የሚፈቅድ ሲሆን ከቤት ያለመውጣት አድማን፣ንግድ ቤትን አለመክፈትን፣ መንገድ መዝጋትን ጨምሮ ሰላማዊ ተቃውሞን ይከለክላል።

የአስቸኳይ ጊዜ አዋጁን ተላልፎ የተገኘ ማንኛውም ሰው ያለ ኮማንድ ፖስቱ ትእዛዝ ሊታሰርና ሊከሰስ ይችላል። ተሃድሶ እንዲወስድም ይደረጋል። ክስ ሳይመሰረት በእስር ማቆየት የመብት ጥሰቶችና በፖለቲካ አመለካከት ማጥመቅ የሚስተዋልበት ነው። ስቃይና ያልተገባ እስረኛ አያያዝ በኢትዮጵያ ትልቅ ችግሮች ናቸው እንደሆነ ሂዩማን ራይትስ ዋች በሪፖርቱ አመልክቷል።

በነቀምት ውጥረቱ ተባብሶ ቀጥሏል

Standard

(ኢሳት ዲሲ–የካቲት 20/2010) በነቀምት ውጥረቱ ተባብሶ መቀጠሉ ተገለጸ። ዛሬ ጠዋት አንድ ወጣት በአልሞ ተኳሽ ወታደር መገደሉን የደረሰን መረጃ አመልክቷል። የአስቸኳይ ጊዜ አዋጂን በመጣስ ተቃውሞ እያደረጉ ባሉ የነቀምት ነዋሪዎች ላይ ተኩስ የከፈቱት የአገዛዙ ወታደሮች ከ20 በላይ ሰዎች ማቁሰላቸውም ታውቋል። ቤት ለቤት አፈሳ የተጀመረ መሆኑኑም ተመልክቷል። የኦሮሞ ፌደራሊስት ኮንግረስ ኦፌኮ አመራሮች በወለጋ ደጋፊዎቻቸውን ለማግኘት ቀጠሮ የያዙት ከአስቸኳይ አዋጁ ይፋ መሆን ቀደም ብሎ ነበረ። አመራሮቹ መርሃ ግብራቸውን ጠብቀው በየከተሞቹ እየተገኙ ደጋፊዎቻቸውን ሲያነጋግሩ ቆይተው ወደ ነቀምት ያመራሉ። ነቀምት ለመድረስ 5 ኪሎ ሜትር ሲቀራቸው በኮማንድ ፖስቱ መታገታቸውን ነው መረጃዎች የሚያመለክቱት። የነቀምትን ስታዲየም ሞልቶ የሚጠብቃቸው ህዝብ ዜናውን ሲሰማ ወዲያኑ የተቃውሞ ድምጽ ማሰማት መጀመሩ በወቅቱ ተገልጿል። አስቸኳይ አዋጁ ስለሚከለክል ህዝብ መሰብሰብ አትችሉም የተባሉት የኦፌኮ አመራሮች ወደ አዲስ አበባ ሲመለሱ ነቀምት በተቃውሞ ተናወጠች። መንገዶች በተቃጠሉ ጎማዎች ተሞሉ። አገዛዙ ከስልጣን እንዲወርድ የሚጠይቁ መልዕክቶች አደባባይ በወጣው ህዝብ መስተጋባት ጀመሩ። ትላንት መሀል ነቀምት የጦርነት ቀጠና ይመስል ነበር። (ድምጽና ቪዲዮ) ከመሪዎቻቸው ጋር እንዳይገናኙ የተደረጉት የነቀምቴ ነዋሪዎች በአስቸኳይ አዋጅ ውስጥ ሆነውም ተቃውሞአቸውን ቀጥለዋል። ዛሬም ህዝብ ጸረ መንግስት መልዕክቶችን ሲይሰማ እንደነበረ ታውቋል። በተለይ ዛሬ ጠዋት በዋና ዋና የነቀምት አውራ ጎዳናዎች ላይ ከፍተኛ የተቃውሞ እንቅስቃሴ እንድነበረ ተገልጿል። ከቀትር በኋላ ግን ከተማዋን የአገዛዙ ታጣቂዎች መውረራቸውን ከአከባቢው የመጣው ዜና ያስረዳል። የአንድ ወጣት ግድያን ተከትሎ ነቀምት ሙሉ በሙሉ በአገዛዙ ወታደሮች ቁጥጥር ስር መውደቋ ታውቋል። በመሃል ነቀምት አደባባይ ላይ በአልሞ ተኳሽ ጥይት የተገደለው ወጣት አበበ መኮንን የሚባል እንደሆነ ተገልጿል። ወጣት አበበ ከተገደለ በኋላ ለበርካታ ሰዓታት አስክሬኑ አደባባይ ላይ እንዲቆይ ተደርጓል። ከትላንት ጀምሮ በአገዛዙ ወታደሮች በተወሰደ እርምጃ ከ20 በላይ ሰዎች ቆስለው ሆስፒታል ገብተዋል። ከኦፌኮ አመራሮች የወለጋ ጉዞ ጋር በተያያዘ በተነሳ ተቃውሞ የሰው ህይወት ሲጠፋ የዛሬ ሁለተኛው ሲሆን ባለፈው ቅዳሜም በደምቢዶሎ አንድ ሰው መገደሉ ሲታወስ ፡ሰባት ቆስለዋል። መረጃዎች እንደሚያመለክቱት የአስቸኳይ ጊዜ አዋጁን በመጣስ ተቃውሞውን በቀጠለው የነቀምት ነዋሪ ላይ ጥብቅ እርምጃ እንዲወሰድ በኮማንድ ፖስቱ ትዕዛዝ መሰጠቱን ተከትሎ በነቀምት ውጥረት ነግሷል። ለጊዜው ቁጥሩ ባይታወቅም በርካታ ሰዎች መታፈሳቸው ታውቋል። የከተማዋ እንቅስቃሴ የተቋረጠ ሲሆን በመንገዶች ላይ የሚታዩት የአገዛዙ ወታደሮች ብቻ መሆናቸውን በቪዲዮ ተደግፎ ከወጣው መረጃ ለማወቅ ተችሏል።

የተፈቱት እስረኞች ከአሜሪካ ኤምባሲ ሃላፊዎች ጋር ተገናኙ!

Standard

ዛሬ የካቲት 19/2010 የአሜሪካ ኢምባሲ በራዲሰን ሆቴል ለአንዱአለምና አራጌና ለእስክንድር ነጋ የምሳ ግብዣ አደረገላቸው!!

በዚህ የምሳ ግብዣ ላይ ከአሜሪካ ሀገር ወደ ኢትዮጵያ የመጡ ሶስት (3) ሰዎች አንዱአለምንና እስክንድር ያናገሩዋቸው ሲሆን፣ አንደኛዋ ሜሪላንድ ውስጥ ካምብሪጅ የምትባል ከተማ ከንቲባ መሆናቸው ታውቋል። ሁለቱ ግለሰቦች ደግሞ አክቪስቶች ናቸው። በውይይታቸው፣ በብሄራዊ እርቅ ዙሪያ ሰፊ ውይይት ማድረጋቸውን ከስፍራው የደረሰኝ ዜና ያስረዳል።

ችግሮችን በሰላማዊ መንገድና በውይይት መፍታት እንደሚያስልፈግ መነጋገራቸውንና፣ በዚህ ንግግር ላይ ከኢምባሲው ባለስልጣናት የተወከሉ ተጨማሪ ሶስት ሰዎች መገኘታቸው ታውቋል። ሶስቱ ሃላፊዎች የፖለቲካ ክፍልና የፕሬስ ክፍል ባለስልጣናት ሲሆኑ፣በቀጣይም ከኢምባሲው ካሉ ኅላፊዎች ጋር ተጨማሪ ንግግር ለማድረግ ቀጠሮ ይዘው መለያየታቸውን ለማወቅ ተችሏል።

ግልፅ ደብዳቤ ከቄሮ “ክፍት ደብዳቤ ለህዝብ ተወካዮች ምክር ቤት አባላት በሙሉ” ከኦሮሞ ቄሮ የተላለፈ ጥሪ

Standard

ከሁሉም አስቀድመን ባላችሁበት ሰላምታ ይድረሳችሁ።

ሁላችንም እንደሚናውቀው የኦሮሞ ቄሮዎች ህይውታችንን መስዋዕት አዲርገን የኦሮሞ ህዝብ መብትና ብሄርቤረሰቦች እኩልነት የተረገጋጠባትን ኢትዮጽያ ለመመስረት ሰላማዊ ትግል እያደረግን ነው። የኦሮሞ ህዝብ ሰላማዊ ትግል ይህችን አገር እየቀየራት ይገኛል።

ይሁን እንጅ አንባገነን የሆኑ የTPLF ጥቂት ኮንትሮባንዲስቶች ቡድን አገሪቷን ለማዝረፍ በተሃድሶ መሪዎች ና በቄሮ የተዘጋባቸዉን የዝርፍያ መንገድ መልሰዉ ለመቆጣጠር ፣ አገርቷን በጦር ሀይል ለማቆጠጣር አስቻኳይ ግዜ አወጅ እያዋጁ ይገኛሉ። ይሄ አዋጅ በማንኛውም ሁኔታ ተቀባይነት አይኖረዉም።

የተከበራችሁ የህዝብ ተወካዮች ምክር ቤት አባላት ኮንትሮባንድስቶች አገሪቷን ለመበዝበዝ እና ለመበታተን በኦሮሞ ህዝብና በመላው ብሄርቤረሰቦች ላይ የታዋጀ አዋጅ እንዲሰረዝ የበኩላችሁን የዜግነት ግደታ በመወጣት አገሪቷን ከዉድቀት እና ከመበታተን እንድታድኑ የኦሮሞ ቄሮ በዚህ ደብዳቤ ጥሪያችንን እናስተላልፋለን።

ከዚህ እልፎ አዋጁ የሚጸድቅ ከሆነ የኦሮሞ ቄሮና ህዝብ የአፀፋ ምላሽ ተጠያቂዎቹ TPLF ና የህዝብ ተወካዮች ምክር ቤት አባላት መሆናችሁን እናሳስባለን።

ከሰላምታ ጋር

የኦሮሞ ቄሮ”

ህወሃት ያወጀው የአስቸኳይ ጊዜ አዋጁ እንዳይሰራ ማድረግ ቀዳሚ ተግባራችን ነው።

Standard

ከአርበኞች ግንቦት 7

ህዝባዊ ወያኔ ሃርነት ትግራይ መላው ህዝባችን እየጠየቀ ያለውን የእኩልነትና የነጻነት ጥያቄ በወታደራዊ ሃይል ለመጨፍለቅና ላለፉት 27 አመታት የኖርንበት አይነት የግፍና የመከራ ዘመን ለማስቀጠል ወስኖ እንቅስቃሴ ለማድረግ መዘጋጀቱን የካቲት 8 ቀን 2010 ይፋ ባደረገው የአስቸኳይ ጊዜ አዋጅ አረጋግጦአል።

በመላው አገራችን የተቀሰቀሰውን ይህንን ህዝባዊ ተቃውሞ ለመጨፍለቅ ያስችለኛል ብሎ ህወሃት ያወጀው ይህ የአስቸኳይ ጊዜ አዋጅ የታወጀበትን ወቅት ብንመለከት፤ የኢህአደግ ሥራ አስፈጻሚ ኮሚቴ በቅርቡ አድርጎት በነበረው አስቸኳይ ስብሰባ አገሪቱ ለገባቺበት የፖለቲካ ቀውስ ሙሉ ሃላፊነት ወስዶ መፍትሄ ፍለጋ ከሁሉም ተቃዋሚ ድርጅቶች ጋር እንደሚነጋገርና የፖለቲካ ምህዳሩን ለማስፋት በቁርጠኝነት እንደሚሠራ “ውሳኔ አስተላልፌያለሁ” ባለ ጥቂት ወራት ውስጥ ነው። ከዚህ በተጨማሪ ላለፉት 6 አመታት የአገሪቱን ጠቅላይ ሚንስትርነትና የኢህአደግ ሊቀመንበርነትን ሥልጣን ይዞ የቆየው ሃይለማሪያም ደሣለኝ ለዚህ ውሳኔ ተገዥ በመሆን “ሠላማዊ የሥልጣን ሽግግር” ለማድረግ ይቻል ዘንድ “ሥልጣኔን በገዛ ፈቃዴ ለቅቄያለሁ” ብሎ ባስታወቀ ዕለት ማግሥት መሆኑ በሰፊው እያነጋገረ ነው ።

ህወሃት/ኢህአደግ በህይወት ዘመኑ ሁሉ ለቃሉ እንደማይታመን የኢትዮጵያ ህዝብ ጠንቅቆ የሚያውቅ ቢሆንም የሃይለማሪያም ደሣለኝ የሥልጣን መልቀቂያ ጥያቄውን ይፋ ከማድረጉ ጥቂት ቀናት በፊት ጀምሮ አንድም ቀን እስከነመኖራቸው አገዛዙ ምንም አይነት እውቅና ሰጥቶ የማያውቅ በርካታ የፖለቲካና የሂሊና እስረኞችን መፍታት በመጀመሩ፡ ህወሃቶችና የሚመሩት መንግሥት ወደ ሂሊናቸው ተመልሰው ህዝባችን ለአመታት ሲታገልለትና ውድ ህይወቱን ሲገብርለት የኖረውን የዲሞክራሲ ጥያቄ ዕልባት እንዲያገኝ የራሳቸውን አስተዋጾ ለማድረግ የተዘጋጁ መስሎት አብዛኛው ህዝብ በትልቅ ተስፋና ጉጉት ሁኔታውን ሲከታተል ሰንብቶአል።

እስከ አገባደድነው ሳምንት አጋማሽ በአብዛኛው የኦሮሚያ፤ የአማራና አንዳንድ የደቡብ ከተሞች ህዝብ አደባባይ በመውጣትና ቤት ውስጥ በመቀመጥ አድማ ሲጠይቅ የነበረውም ይህ የተጀመረው እስረኞችን የመፍታት በጎ ጅምር ተፋጥኖ እስር ቤት የቀሩት ፖለቲካ እስረኞች በሙሉ እንዲለቀቁና ሁሉንም ያቀፈ ብሄራዊ ውይይት እንዲጀመርና አገራችን ከገባቺበት የፖለቲካ አጣቢቅኝ እንድትወጣ መፍትሄ እንዲፈለግ የሚያሳስብ ነበር።

ከፍጥረቱ ጀምሮ ለኢትዮጵያ አገራችንና ለህዝቧ ደንታ ኖሮት የማያውቀው ወያኔ ግን ህዝብ ተስፋ ያደረገውን ይህንን እድል ለማጨለምና የታገለለትን ዓላማ ለመቀልበስ ያስችለኛል ብሎ ያመነበትንና ከአመት በፊት ሞክሮ ያልተሳካለትን ወታደራዊ አገዛዝ አገራችን ላይ መልሶ ለማስፈን ህዝባችንን እያስቆጣ ያለ ይህንን የአስቸኳይ ጊዜ አዋጅ እንደገና አውጆአል።

የንቅናቄያችን ሊቀመንበር ፕሮፈሰር ብርሃኑ ነጋ ይህንን የአስቸኳይ ጊዜ አዋጅ አስመልከተው ለኢትዮጵያ ህዝብ ባስተላለፉት መልዕክት እንደገለጹት፣ የኢትዮጵያ ሕዝብ ህወሃት ላለፉት 27 አመታት በአገራችንና በህዝቧ ላይ ያመጣውን መዓትና የወረደውን ግፍ ለሀገር ሠላም ሲባል በብሄራዊ እርቅ ስሜትና እነርሱንም ባሳተፈ የድርድር ሄደት እንዲፈታ በሠላማዊ ህዝባዊ ትግል እየጠየቀ ባለበት ወቅት፣ ይህ አዋጅ መታወጁ ህወሓት/ኢህአዴግ ስልጣኑን ለማስጠበቅ ሲል የሚሄድበት ርቀት ምን ያህል የእብደት መንገድ እንደሆነ የሚያሳይ” ብቻ ሳይሆን፣ በህወሃት ውስጥ ያሉ የአገዛዙ ቁንጮዎች እንወክለዋለን ሲሉ የኖሩትን የትግራይ ህዝብ ጨምሮ ከተጠናወታቸው የግል ጥቅም አስበልጠው የሚጨነቁለት ህዝብ ወይም አገር ፍቅር ስሜት የሚባል ነገር የሌላቸው መሆኑን የሚያረጋግጥ ነው።

ይህንን ሃቅ ያልተረዱ አንዳንድ ወገኖች እንደሚከራከሩት ህወሃት ውስጥ ትንሽም ቢሆን የህዝብና የአገር ፍቅር ስሜት ያላቸው የአመራር አባላት ቢኖሩ ኖሮ፣ ከሁለት አሥርተ አመታት በላይ ለዘለቀ ጊዜ ልዩ ልዩ የጠላትነት ታፔላ እየተለጠፈለት በጭካኔ ሲጨፈጨፍ ፤ ሲታሠር ፤ ሲገረፍ ፤ ከትውልድ መንደሩና ቄዬው ሲፈናቀልና ሲሰደድ የኖረው ህዝብ ለሠላም ሲል የተፈጸመበትን መከራና ስቃይ ፋይሎችን ሁሉ በብሄራዊ እርቅ ዘግተን እናንተንም ጭምር ያካተተ የሽግግር ምዕራፍ ይከፈት ብሎ ሲጠይቅ “ምን ታመጣለህ?” በሚል እብሪትና ጀብደኝነት ከራሱ ከህዝብ አብራክ የወጣውን የመከላኪያ ሠራዊት ህዝብ ላይ ለማዝመትና አገራችንን ወደ የርስ በርስ ብጥብጥ ለመክተት እንዲህ አይነት አፋኝ አዋጅ ባላወጀ ነበር።

ታጋሽ፣ ጨዋና አስተዋይ ይሆነው የኢትዮጵያ ህዝብ እስከዛሬ ሲፈጸምበት የኖረውን መከራና ስቃይ ሁሉ ለሠላም ሲል ይቅር ብሎ ለህወሃት የይቅርታ እጁን የዘረጋው፣ ድርጅቱ ሥልጣን ከተቆጣጠረበት ጊዜ ጀምሮ በመብቱ፣ በብሄራዊ ጥቅሙና በሉአላዊነቱ ላይ ሲፈጽማቸው የኖረውን ግፍና ወንጀሎች ሁሉ ሳያሳምሙት ቀርተው አልነበረም። ወይንም ደግሞ ህወሃቶች እንደሚያስቡት የሚተማመኑበት ወታደር ብዛትና መሣሪያ ጋጋታ የጀግንነት ወኔውን ሰልቦት በባርነት እየተረገጠ መገዛትን ፈቅዶ አይደለም። የአጋዚ ጦር በጠራራ ጸሃይ የሚፈጽምበትን ጭፍጨፋ እየተመለከተ ግንባሩን ሳያጥፍ ላለፉት ሶስት አመታት ባዶ እጁን “ነጻነቴን መልስልኝ!” እያለ ከአገዛዙ ጋር ፊት ለፊት እየተጋፈጠ ያለው ለዚህ ምስክር ነው።

አርበኞች ግንቦት 7 ደጋግሞ ለመግለጽ እንደሞከረው ህወሃት እየገጠመው ከመጣው አገር አቀፍ ህዝባዊ ተቃውሞ በተጨማሪ በራሱ በድርጅቱ ውስጥ በተፈጠረው የጥቅምና የሥልጣን ሽኩቻ አንድነቱ የተናጋ ድርጅት ከመሆን አልፎ በገዛ አገራቸውና ወገናቸው ኪሳራ እስከ ዛሬ መሣሪያ ሆኖ ሲያገልግሉት የኖሩት የኢህአደግ አባል ድርጅቶች (በተለይም ኦህዴድና ብአዴን) ከአሁን ቦኋላ “የበላይነትህን አንቀበልም” ብለው አጣብቅኝ ውስጥ የከተቱት ድርጅት በመሆኑ፣ እንኳን ይህንን አስቸኳይ ጊዜ አዋጅ በመላው አገሪቱ ላይ ሊያስፈጽም ቀርቶ እንደ ድርጅትም ጸንቶ ለመቆየት የሚያስችለው አቅም እንደለለው ያምናል።

ይህንን አቅሙን የተረዱት ምዕራባዊያን ወዳጆቹ ሰሞኑን ባወጡት ጠንከር ያለ መግለጫ በአጉል ትዕቢትና ጀብደኝነት ተጠምዶ እራሱንና አገሩን ወደ ከፋ አደጋ ከመውሰድ እንዲታቀብና አስቸኳይ ጊዜ አዋጁን በአስቸኳይ አንስቶ ከሁሉም ተቃዋሚ ፖለቲካ ድርጅቶች ጋር በመደራደር አገራዊ መፍትሄ እንዲፈልግ አሳስበውታል። የህወሃት መሪዎች ምዕራባዊያን ወደጆቻቸውና የኢትዮጵያ ህዝብ እያቀረቡላቸው ያለውን ጥሪ ተቀብለው የህዝባችንን የለውጥ እንቅስቃሴ ከግብ ለማድረስ የሚያስችል እርምጃ ቢወስዱ እራሳቸውንና ድርጅታቸውን ከህግና ከታሪክ ተጠያቂነት ያድናሉ ፤ የለውጡ አካልም በመሆን ህልውናቸውንና ጥቅማቸውን ለማስከበር እድል ያገኛሉ። ይህ ዕድል እንዳያመልጣቸው ለህዝብ እንጨነቃለን የሚሉ አባላትና ደጋፊዎቻቸው በሙሉ አቅማቸው የሚችለውን ሁሉ ተጽዕኖ ሊያደርጉ ይገባል።

አርበኞች ግንቦት 7 ህወሃት ህዝባችንን ለማፈንና የባርነት አገዛዙን መልሶ ለማስፈን ያወጣውን የአስቸኳይ ጊዜ አዋጅ እንደ ከዚህ በፊቱ ፍጹም ሊሠራ የማይችል መሆኑን ለማሣየት ለመብቱና ለነጻነቱ እየተፋለመ ካለው ህዝባችን ጎን ቆሞ በሁሉም የትግል መስክ ተግቶ ይሠራል። በዚህም የተነሳ የኢህአደግ አባል ድርጅቶች ውስጥ እየታዩ ያሉ አንዳንድ የለውጥ ሃይሎች የሚያደርጉትን ጥረት ተስፋ አድርገው የሚጠባበቁ ካሉ፣ ይህ አዋጅ እነርሱንም ጭምር ጭዳ ለማድረግና በሁሉም የአገራችን ክፍሎች ወታደራዊ አገዛዝ ለማስፈን የታለመ መሆኑን ተገንዝበው አዋጁ እንዳይሰራ ለማድረግ ከህዝባችን ጎን እንዲሠልፉ ወገናዊ ጥሪውን በየደረጃው ላሉ ለነዚህ የኢህ አደግ አባላትና ደጋፊዎች ያቀርባል ። ኦህዴድንና ብአዴንን በመወከል የአገሪቱ ፓርላማ አባላት ሆነው በማገልገል ላይ ያሉ የህዝብ ተወካዮች ነን የሚሉ ወገኖችም የህዝብን መብትና ስብዕና የሚጋፋ ይህ የአስቸኳይ ጊዜ አዋጅ በፓርላማው እንዳይጸድቅ አቅማቸው የፈቀደውን ሁሉ ጥረት ማድረግ እንደሚጠበቅባቸውም ያሳስባል። ይህንን ታሪካዊ ሃላፊ ነታቸውን መወጣት ተስኖአቸው አዋጁ እንዲጸድቅ ካደረጉ፣ በአዋጁ ምክንያት በአገራችንና በህዝባችን ላይ ለሚደርሰው በደል ከህወሃት እኩል ተጠያቂ እንደሚሆኑ እንዲገነዘቡም ያስጠነቅቃል።

ከህዝብ አብራክ የወጣው የአገራችን መከላኪያ ሠራዊት ፤ የፖሊስና የደህንነት ተቋም አባላትም በሙሉ ህወሃት የሥልጣን ዕድሜውን ለማራዘም ሲል ህዝባችንን እርስ በርስ ለማጋጨትና አገራችንን ወደ ትርምስ ለመውሰድ ያወጣውን ይህንን አፋኝ አዋጅ ፈጽሞ ሥራ ላይ እንዳይውል እንዲከላከሉና የሚሠጣቸውን ተእዛዝ እንዳይቀበሉ ንቅናቄያችን አርበኞች ግንቦት 7 ወገናዊ ጥሪውን ያቀርብላቸዋል።

የትግራይ ህዝብን ጨምሮ መላው የአገራችን ህዝብ መውደቂያው የተቃረበው የህወሃት አገዛዝ ከፊት ለፊታችን የደቀነውን አደጋ በጋራ ለመመከትና ሁላችንም እኩል ተጠቃሚ የምንሆንባት አገር ባለቤት ለመሆን የሚደረገውን ትግል እስከመጨረሻው የድል ቀን ድረስ በቁርጠኝነት እንዲገፉ ንቅናቄያችን ወገናዊ ጥሪውን ያስተላልፋል።

ድል ለኢትዮጵያ ህዝብ !!

(ኢሳት ዲሲ–የካቲት 16/2010) የአዲስ አበባ ከተማ አስተዳደር በከፍተኛ የበጀት እጥረት ውስጥ መግባቱ ተገለጸ

Standard

(ኢሳት ዲሲ–የካቲት 16/2010) የአዲስ አበባ ከተማ አስተዳደር በከፍተኛ የበጀት እጥረት ውስጥ መግባቱ ተገለጸ። ከፍተኛ ገቢ የሚጠበቅበት የመሬት ሊዝ ጨረታ ላለፉት 8 ወራት አልተካሄደም። መስተዳድሩ በግማሽ አመቱ እሰበሰባለሁ ብሎ ካቀደው ማግኘት የቻለው ከግማሽ በታች ነው።እንደ ሪፖርተር ዘገባ ከሆነ የተሰበሰበው ገቢ የአስተዳደሩን የመደበኛ ወጪ ከመሸፈን የሚያልፍ አይደለም።በአመቱ ይሰራሉ ተብለው በእቅድ የተያዙ ካፒታል ፕሮጀክቶች ከእቅድ እንደማይዘሉ ጨምረው ገልጸዋል። በሃገሪቱ የተከሰተው የፖለቲካ ቀውስ፣የውጭ ምንዛሪ እጥረት፣የንግድና አገልግሎት ተቋማት መዳከም፣ነጋዴውና የከተማው ነዋሪ ለመስተዳድሩ ግብር ለመክፈል ፍላጎት ማጣትና የአስተዳደሩ ሰራተኞች በፍላጎት ለመስራት ዝግጁነት ማጣት ዋና ዋናዎቹ ምክንያቶች እንደሆኑ ተመልክቷል። በሀገሪቱ ተፈጠረው የጸጥታ ችግርና የፖለቲካ ቀውስ ምክንያት የውጭ ኢንቨስተሮች ተሳትፎም እንደቀነሰ ማወቅ ተችሏል። በ2009 በአዲስ አበባ ንግድና ዘርፍ ማህበራት ምክር ቤት በተሰናዳው የአለም አቀፍ የንግድ ትርኢት ከ20 ሀገሮች በላይ የሚገኙ 160 በላይ የውጭ ኩባንያዎች የተሳተፉ ቢሆንም ፣ ከሁለት ሳምንት በኋላ በሚካሄደው አውደ ርዕይ የተሳታፊዎች ቁጥር እንደሚቀንስ ታውቋል ። ለመሳተፍ ፍላጎት ያሳዩት 11 ሃገራት ብቻ እንደሆኑም መረዳት ተችሏል።በሌላ በኩል የአዲስ አበባ ከተማ መስተዳድር ከፍተኛ ገቢ የሚሰበስብበት የመሬት ሊዝ ጨረታ ላለፉት 8 ወራት ማካሄድ እዳልቻለ ምንጮቻችን ጠቁመዋል።